Кыргыз Республикасынын “Кыргыз Республикасынын мамлекеттик тили жөнүндө” Мыйзамын ишке ашыруу, Бириккен Улуттар Уюмунун жана ЮНЕСКОнун чечеиминин негизинде кыргызстанда жашаган бардык улуттардын эне тилдерин натыйжалуу өнүктүрүүнү камсыз кылуу максатында КРдин БИМинин 2021-жылдын 15-февралындагы №133/1 буйругуна ылайык,     21-февраль –  Бүткүл дүйнөлүк эне тилдин Эл аралык күнүнө карата К. Карасаев атындагы Бишкек мамлекеттик университетинин Мамлекеттик тил кафедрасы “Улуттун башаты –эне тил” аттуу салтанаттуу онлайн кече өткөрдү.

    Ар бир тил өзүнө ыйык, өзүнчө керемет. Дүйнөдө канча тил босо, ошол тилде сүйлөгөн улуттун баары өз эне тилинин түбөлүктүүлүгүн көздүн карегиндей сактоого, урпактарга улуу мурас кылып берүүгө аракеттерин жасап келет. Кыргыз эли да улуу эл катары өз эне тилинин түбөлүктүүлүгү үчүн бир топ тарыхий оор кырдаалды башынан өткөргөн. Мындай тарыхий мурас бүгүнкү күнү да учугун үзбөй уланып, жаштардын дилине эне тилдин ыйыктыгын сиңирип, аны жүрөктүн деми менен бирге соккудай кылып жашоо үчүн мекенчил жаштардын колдоосу менен салтанаттуу иш-чаралар өткөрүлүп келет. ошондой иш-чаралардын бирин 21-февраль Бүткүл дүйнөлүк эне тилдердин Эл аралык күнүнө карата К.Карасаев атындагы Бишкек мамлекеттик университетинин Мамлекеттик тил кафедрасы жана аталган университеттин 1-курсунун Славиян таануу факультетинин студенттери тарабынан “Улуттун башаты – эне тил” аттуу салтанаттуу кечени онлайн форматында даярдашты. Иш-чаранын негизги максаты Республикада жашап жаткан ар бир улут эне тилин аздектеп сактап, урпактарга өткөрүп берүү менен бирге, мамлекеттик тилге болгон бийик урматоосун даңазалоо болуп эсептелинет.

    “Улуттун башаты – эне тил” аттуу салтанаттуу онлайн иш-чарага К.Карасаев атындагы Бишкек мамлекеттик университетинин мамлекеттик тил жана окуудан тышкаркы иштер боюнча проректор Азамат Ташыбекович Сатиев куттуктоо сөзүн сүйлөп, ачып берди.